O domingo 27 de setembro de 2009 realizouse en 22. concellos de Galicia a II limpeza simultánea de ríos. Co nome de “Tes unhas botas na casa?”, ADEGA e o Proxecto Ríos organizamos unha campaña de recollida de lixo nos cursos fluviais do noso país. Neste segundo ano sumáronse á iniciativa concellos, asociacións de pescadores, culturais, ecoloxistas… de 22 lugares de Galicia. Algúns deles xa participaron na actividade do ano pasado ou están activos no Proxecto Ríos, outros sumáronse por primeira vez nesta segunda edición á retirada de materia inerte (plásticos, papeis, refugallos varios, etc.) dos cursos e das marxes dos ríos. Dende o Proxecto Ríos e ADEGA queremos agradecer profundamente a todos os colectivos que se implicaron na coordinación da limpeza na súa zona. Agradecer tamén aos concellos o compromiso na conservación dos ríos que regan os seus municipios proporcionando o material necesario para realizar a limpeza e a recollida do lixo retirado dos ríos e/ou apoiando economicamente a actuación. 

 Dossier Limpeza 2009b.pdf (743.03 KB)

Para levar a cabo a actuación reeditouse o Protocolo de limpeza 2009 (600 KB) coa fin de ofrecer unhas pautas sobre cómo se debe facer unha limpeza ecolóxica nos ecosistemas fluviais. Neste protocolo explícase polo miúdo que facer antes da limpeza, durante a limpeza e despois da limpeza, así como que facer coa suposta "maleza" que moitas veces está presente nos ríos. Tamén agasallouse aos/ás voluntarios/as que participaron con unhas camisolas co lema da actividade.

As limpezas realizáronse en xornada de mañá en diferentes ríos do país, comezando sobre as 10.00h e rematando arredor das 13.30h. Nestas intensas horas de traballo foron retirados centos de quilos de lixo, o que indica, por unha banda, a situación de abandono no que aínda se atopan moitos dos nosos ríos, sobre todo aqueles que atravesan núcleos de poboación; e por outra que, en pouco tempo de traballo, un pequeno grupo de persoas pode facer un gran beneficio aos ecosistemas fluviais. Hai que erradicar definitivamente a horrible idea de que os ríos, os mares ou os montes son vertedoiros. Cando pretendemos desfacernos do lixo sacándoo da nosa vista tarde ou cedo aparecerá fedorento dándonos nos fociños.

De seguido aparece unha relación dos colectivos participantes onde se especifica en que río se actuou, o número de persoas que foron a limpar e a cantidade de lixo se retirou.

Total:
Voluntarios/as: 276
Kg lixo: 6.930