Co inicio do ano, dende o Proxecto Ríos, editamos un calendario que achegamos a todos/as os/as participantes, co obxectivo de informar das actividades previstas para o 2009. No CALENDA-RÍO 2010 pódense consultar as datas das actividades centrais do Proxecto Ríos deste ano.

Descarrega o calendario aquí Calenda-Río 2010.pdf (1 MB)

• Campañas de inspección: marcan as datas nas que os/as participantes no Proxecto deben realizar as súas inspeccións de río. A campaña de primavera comeza o 15 de abril e esténdese até o 31 de maio. A campaña de outono iníciase o 15 de setembro e remata o 31 de outubro.

• Cursos de formación: para fornecer aos participantes dos coñecementos sobre a identificación de macroinvertebrados, o Proxecto Ríos organiza estes cursos na Estación de Hidrobioloxía do Encoro do Con durante as campañas de inspección. En primavera farase o 17 de abril e en outono o 2 de outubro. Ademais da identificación destes animais chave para saber o estado de saúde do treito inspeccionado, nos cursos de formación tratamos temáticas, a través de charlas-debate, relacionadas con aspectos relevantes que afectan aos cursos fluviais.

• Encontros de voluntariado: é o espazo no que os/as voluntarios/as participantes poden presentar as súas experiencias relacionadas coas inspeccións de río, ademais de intercambiar opinións, coñecer a outros grupos, resolver dúbidas, etc. Levarase a cabo o día 29 de maio.

• Saídas formativas: durante as campañas de inspección os grupos poden solicitar saídas guiadas no seu treito de río co obxectivo de asimilar a metodoloxía empregada nas inspeccións.

• Informe do Estado de Saúde dos Ríos Galegos: con todos os datos recollidos polos participantes nas dúas campañas, no Proxecto Ríos elaboramos un Informe Anual para coñecer o estado se saúde dos ríos inspeccionados. Este informe presentarase o 15 de decembro de 2010.
Outras actividades previstas para este ano son:

• Calendario fenolóxico: é unha actividade que ten como obxectivo coñecer o estado e o tempo de floración de determinadas especies de árbores ao longo de varios anos. Con este estudo pretendemos obter unha instantánea de cómo pode afectar o cambio climático no desenvolvemento dos ciclos vitais destas especies que habitan nos ríos galegos e que condicionan, en moitos casos, a vida doutras especies, tanto de flora como de fauna. As saídas para coñecer o estado de floración faranse na semana do 5 – 11 de abril.

• Roteirríos 09: programa de itinerarios que pretende divulgar e poñer en valor algún aspecto relacionado cos ríos de Galiza. Este é o cuarto ano no que se desenvolve este programa e que ten moi boa acollida na sociedade en xeral e non só entre os/as participantes do Proxecto Ríos. Este ano estarán centrados no coñecemento dos ríos de alta montaña. Os roteiros serán: o 13 e 14 de marzo e o 25 de setembro. Os lugares a visitar están aínda por determinar. Estade atentos á nosa web para máis información.

• Limpeza simultánea de ríos: en 2008 iniciamos unha nova actividade de conservación dos cursos fluviais relacionada coa retirada de lixo e editamos un protocolo para a realización dunha limpeza ecolóxica nos ríos sen prexudicar aos seres vivos que habitan neles, actividade que tivo continuidade en 2009. Este ano seguiremos convocando aos grupos participantes no Proxecto a realizar esta limpeza ecolóxica co apoio dos concellos. Desenvolverase o 3 de outubro.

• Campos de voluntariado Ambiental Proxecto Tea: a raíz dos campos de voluntariado no Río Tea realizados en 2007, 2008 e 2009 ao abeiro das axudas do Ministerio de Medio Ambiente, Medio Rural e Mariño, este ano pretendemos continuar traballando na conservación e mellora dos ecosistemas fluviais e proporcionando á sociedade as ferramentas necesarias para aportar solucións aos problemas ambientais dos ríos, organizando outro campo de traballo que terá lugar ao longo de todo este ano 2010.